NDI-ს დაკვეთით ჩატარებული კვლევის მიხედვით, ნატოში გაწევრიანების მომხრეების რაოდენობა კიდევ უფრო შემცირდა, ხოლო მოწინააღმდეგეების რაოდენობა გაიზარდა. ბოლო 5 წლის მანძილზე ნატოში გაწევრიანების მომხრეთა რაოდენობა ყველაზე დაბალია.
გამოკითხულთა 61%-ისთვის მისაღებია მთავრობის გაცხადებული მიზანი საქართველოს ნატოში გაწევრიანების შესახებ, ხოლო 25% ნატოში გაწევრიანებას მიუღებლად მიიჩნევს. NDI-ის 2016 წლის მარტის თვის კვლევის მიხედვით, გამოკითხულთა 68%-ისთვის მისაღები იყო, რომ საქართველო უნდა გახდეს ნატოს წევრი ქვეყანა, ხოლო 19%-ისთვის- მიუღებელი.
ახალი კვლევის მიხედვით, გამოკითხულთა 72%-ისთვის მისაღებია მთავრობის გაცხადებული მიზანი, რომ საქართველო ევროკავშირის წევრი გახდეს, ხოლო 18%-ისთვის- არა.
გამოკითხულთა 53 % ასევე მიიჩნევს, რომ საქართველო ევროპული და ევროატლანტიკური ინტეგრაციით მეტ სარგებელს მიიღებს, ხოლო 31 % ფიქრობს, რომ საქართველო მეტ სარგებელს მიიღებს, თუ რუსეთთან უკეთესი ურთიერთობის ჩამოყალიბების სანაცვლოდ უარს განაცხადებს ნატოსა და ევროკავშირში გაწევრიანებაზე.
გამოკითხვა 2016 წლის 4 ნოემბერი-4 დეკემბრის პერიოდში, საქართველოს მასშტაბით 3,141 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა (ოკუპირებული ტერიტორიების გამოკლებით). კვლევაში საშუალო ცდომილების ზღვარი არის +/- 1,8%. NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს CRRC-საქართველო.