პარლამენტში ინიცირებული კანონპროექტის თანახმად, ეროვნული ბანკის ვიცეპრეზიდენტებს ბანკის პრეზიდენტის წარდგინებით თანამდებობაზე დანიშნავს და გაათავისუფლებს ეროვნული ბანკის საბჭო, ნაცვლად საქართველოს პრეზიდენტისა.

“ეროვნული ბანკის შესახებ” მომზადებული კანონპროექტის თანახმად, ეროვნული ბანკის საბჭოს წევრისა და სააგენტოს საბჭოს წევრის დამატებითი სარგოს ოდენობა არ შეიძლება იყოს ეროვნულ ბანკში არსებულ საშუალო ხელფასზე ნაკლები. კანონპროექტით,  სარგოს ოდეობას პარლამენტი განსაზღვრავს.

საქართველოს კონსტიტუციის 73-ე მუხლი პრეზიდენტის უფლებამოსილებათა ჩამონათვალს განსაზღვრავს. ამ მუხლის ერთ-ერთი ნაწილის თანახმად, “საქართველოს პრეზიდენტი ახორციელებს კონსტიტუციით განსაზღვრულ სხვა უფლებამოსილებებს.” კანონპროექტის განმარტებითი ბარათის თანახმად, არც ერთი სხვა საკანონმდებლო აქტით არ შეიძლება პრეზიდენტის იმ უფლებამოსილებათა დადგენა, რომლებსაც კონსტიტუცია არ ითვალისწინებს.  შესაბამისად, კანონპროექტის ავტორების აზრით, რახან კონსტიტუციით განსაზღვრული არ არის ვიცეპრეზიდენტების დანიშვნის საკითხი, კანონი უნდა შესწორდეს.

პრეზიდენტის საპარლამენტო მდივნის, ანა დოლიძის თქმით, ეს ცვლილება ტექნიკური ხასიათისაა:

“ამ ცვლილებასთან დაკავშირებით გვქონდა კონსულტაციები ეროვნულ ბანკთანაც, საქართველოს პარლამენტთანაც. ეს არის ტექნიკური ხასიათის ცვლილება. ჩვენ ვაზროვნებთ სახელმწიფოებრივად და ამ ცვლილებას არ გამოვეკიდებით. ჩვენ პარლამენტში მიმდინარე პროცესებს  სახელმწიფოებრივი გადმოსახედიდან ვუყურებთ და  ჩვენ არ ჩავებღაუჭებით იმ უფლებამოსილებებებს, რომლებიც მხოლოდ ტექნიკური ხასიათისაა”, – აღნიშნა დოლიძემ.