რუსეთ-სომხეთის მაგისტრალური გაზსადენის აფეთქების მცდელობის (ე.წ ტერაქტის) საქმეზე დაკავებულ ორ ადამიანს თბილისის საქალაქო სასამართლომ აღკვეთის ღონისძიების სახით პატიმრობა გირაოთი შეუცვალა.
ერთ-ერთი მათგანი, პოლიციის თანამშრომელი ლევან მამფორია სამსახურებრივი უფლებამოსილების გადამეტების ბრალდებით დააკავეს, ხოლო მეორე – ირაკლი ბაღიშვილი დანაშაულის შეუტყობინებლობის ბრალდებით. თბილისის საქალაქო სასამართლოს ინფორმაციით, მამფორიას გირაოს სახით 5 000 ლარის გადახდა შეუფარდეს, ბაღიშვილს კი – 4 000. მათ ბრალად არ ედებათ უშუალოდ ტერაქტის მომზადება.
სახელმწიფო უსაფრთხოების სამსახურმა 2016 წლის 20 აგვისტოს დააკავა 7 ადამიანი გაზსადენის აფეთქების მცდელობის საქმესთან დაკავშირებით. 5 მათგანი დაკავებულია ტერორისტული აქტის ჯგუფურად მომზადებისთვის და ტერორისტული მიზნით ცეცხლსასროლი იარაღის, საბრძოლო მასალისა და ფეთქებადი ნივთიერებების მართლსაწინააღმდეგო შეძენა-შენახვის, ტარებისა და ამავე დანაშაულის ჩადენაში დახმარებისთვის.
სუს-ის ცნობით, ჯგუფი სოფელ საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილის ღია მონაკვეთის აფეთქებას აპირებდა. სუს-ის ინფორმაციითვე, ამ მიზნის განსახორციელებლად 20 აგვისტოს დანაშაულებრივი ჯგუფის წევრები გაემგზავრნენ ჟინვალი-შატილის საავტომობილო გზის მახლობლად ტყის მასივში არსებული იარაღის სამალავიდან ასაფეთქებელი ნივთიერებების ამოსაღებად. “სამალავიდან მათ ამოიღეს 4 ცალი 200-გრამიანი ტროტილის კოჭა, ორი სახის ცეცხლგამტარი ზონარი, 5 ცალი კაფსულა დეტონატორი, ერთი ცალი ე.წ. „უემკაზე“ მუხტი, ერთი ცალი რუსული წარმოების ე.წ. “ვეზედეს“ მუხტი თავისივე ამფეთქით, რუსული წარმოების ერთი ცალი ამფეთქი და მოათავსეს ავტომანქანაში, რა დროსაც დააკავეს სუს-ის კონტრდაზვერვის დეპარტამენტის თანამშრომლებმა. გამომძიებლების მიერ სამალავის დათვალიერების შედეგად ამოღებულია დამატებით 3 ერთეული ავტომატური ცეცხლსასროლი იარაღი მჭიდებით და საბრძოლო მასალა. ერთ-ერთი დაკავებულის ბინაში, მისი პერსონალური კომპიუტერიდან ამოღებულია რუკა, სადაც დატანილია ის ადგილები, რომლის აფეთქებასაც დანაშაულებრივი ჯგუფის წევრები გეგმავდნენ,”- წერია სუს-ის მიერ 22 აგვისტოს გავრცელებულ განცხადებაში.