საქართველოს სახალხო დამცველის, უჩა ნანუაშვილის განცხადებით, ომბუდსმენის ოფისი ხარაგაულის მუნიციპალიტეტის სოფელ ზვარეში მუშების ცემის საქმის გამოძიებას აკვირდება.

“ჩვენ დავინტერესდით ზვარეში მიმდინარე მოვლენებით, თუმცა ამ ეტაპზე რაიმე დეტალური ინფორმაცია არ გაგვაჩნია. ვცდილობთ, მაქსიმალურად მეტი ინფორმაცია მივიღოთ ყველა იმ მხარისგან, რომელიც ამ პროცესში იყო ჩართული. როგორც ცნობილია, გამოძიება მიმდინარეობს, რამდენიმე ადამიანი დააკავეს. ჩვენ თვალყურს მივადევნებთ გამოძიების მიმდინარეობას,” – აღნიშნავს უჩა ნანუაშვილი.

ზვარეს მოსახლეობა და მუშები ამჟამად  ითხოვენ, “23-ე ბიუროს ჯგუფმა” დატოვოს ობიექტი (მშენებარე რკინიგზა). მომხდარის გამო შეშფოთებას გამოხატავს ხარაგაულის ადგილობრივი ხელისუფლება და შესაბამის სახელმწიფო უწყებებს დროული და ეფექტური რეაგირებისკენ მოუწოდებს.

“თბილისის სოლიდარობის ქსელის” ინიციატივით 4 ნოემბერს საპროტესტო აქცია-მსვლელობა გაიმართება თბილისში ხარაგაულის მუნიციპალიტეტის სოფელ ზვარეში რკინიგზის მშენებლი კომპანიის, “ჩინეთის რკინიგზის 23-ე ბიუროს ჯგუფის” წინააღმდეგ, კომპანიის მიერ ზვარეში დასაქმებული მუშების მხარდასაჭერად.

აქცია, რომელსაც ნავთობის პროფკავშირი მართავს, პარასკევს, 4 ნოემბერს, 17:00 საათზე დაიწყება “ბრიტიშ პეტროლიუმის” ოფისთან (ცინცაძის 24-ში), შემდგომ კი აქციის მონაწილეები საქართველოს რკინიგზასთან გადაინაცვლებენ.

აქციის მონაწილეები მოითხოვენ:

• დადგეს ადგილობრივი მენეჯმენტის პასუხისმგებლობის საკითხი და შინაგან საქმეთა სამინისტრომ მიანიჭოს ინციდენტს შესაბამისი კვალიფიკაცია;
• მომხდარზე პასუხისმგებლობა აიღოს “საქართველოს რკინიგზამ”, – ის ამ დრომდე მომხდარზე პასუხისმგებლობას არ იღებს, მიუხედავად იმისა, რომ სწორედ “საქართველოს რკინიგზის” ქვეკონტრაქტორია აღნიშნული კომპანია. რკინიგზაში აცხადებენ, რომ ზვარეში მომხდარი ინციდენტი “სხვა კომპანიის შიდა პროცესებია”, რომელზეც საქართველოს რკინიგზა ვერ გააკეთებს კომენტარს;
• ანაზღაურდეს იძულებითი მოცდენა “საქართველოს რკინიგზის” მიერ, იმის გათვალისწინებით, რომ ამჟამად გამოძიების მიერ ობიექტზე სამუშაო პროცესი შეჩერებულია.