“მაჟორიტარული სისტემის გაუქმებას, სავარაუდოდ, მხარს დავუჭერ”, – ეს განცხადება საქართველოს პარლამენტის წვერმა დიმიტრი ხუნდაძემ გააკეთა დღეს, 1 ნოემბერს.
“მე [ეს] ჩემი ხელმოწერითაც დავადასტურე პარლამენტში, მაგრამ სანამ მაჟორიტარული სისტემა გაუქმდება, თვითმმართველობა უნდა გაძლიერდეს. ეს იქნება იმის წინაპირობა, რომ ეს სისტემა შემდგომში საჭირო აღარ იყოს”, – განაცხადა ხუნდაძემ.
მაჟორიტარული კომპონენტის გაუქმებას და მთლიანად პროპორციულ საარჩევნო სისტემაზე გადასვლას ოპოზიცია და არასამთავრობო სექტორის ნაწილი რამდენიმე წელია ითხოვს, თუმცა 2012-2016 წლების მოწვევის პარლამენტში “ქართულმა ოცნებამ” განაცხადა, რომ სისტემას 2020 წლამდე არ შეცვლის. დღეს “ქართული ოცნების” ერთ-ერთი ლიდერი ამბობს, რომ საჭიროა მოსახლეობასთან თათბირი იმაზე, უნდა გაუქმდეს თუ არა მაჟორიტარული სისტემა. მისივე თქმით, გუნდში ამ საკითხზე აზრთა სხვადასხვაობა არსებობს.
