მუსლიმების ლოცვა მოხეში სადაო შენობის გარეთ. მოხე, ადიგენი, საქართველო. 15/10/2016 ფოტო: სამხრეთის კარიბჭე

დღეს მოხეში მუსლიმებმა სადავო შენობის გარეთ ილოცეს

დღეს ადიგენის მუნიციპალიტეტის სოფელ მოხეში მუსლიმებმა სადავო შენობის გარეთ ილოცეს. მოხეში მობილიზებული არიან სამართალდამცველებიც.

ამ ინფორმაციას და შესაბამის ფოტომასალას  ადგილობრივი გამოცემა “სამხრეთის კარიბჭე” ავრცელებს.

გუშინ, 14 ოქტომბერს მოხეში სადავო შენობის კარი პოლიციამ მას შემდეგ აჭედა, რაც იქ მუსლიმები მივიდნენ და ლოცვა დაიწყეს. ამ შენობის საკითხს კი შესაბამისი კომისია ორი წელია სწავლობს.

ადგილობრივმა მუსლიმებმა sknews-ს განუცხადეს, რომ  ის შენობა, სადაც აქამდე ლოცულობდნენ, მეპატრონეს დასჭირდა და ამიტომაც მივიდნენ იმ შენობასთან, სადაც მეჩეთის გახსნის უფლებას რამდენიმე წელია ითხოვენ და აცხადებენ, რომ აქ ადრე მეჩეთი იყო, თუმცა შენობაზე პრეტენზიას მართლმადიდებლებიც აცხადებენ.

14 ოქტომბერს  მუსლიმების ლოცვას პროვოკაცია უწოდა  ახალციხისა და ტაო-კლარჯეთის მიტროპოლიტმა  მეუფე თეოდორემ. ის და მისი მრევლი მოხეში მუსლიმების მეჩეთის აშენებას ეწინააღმდეგებიან.

2014 წელს რელიგიის საკითხთა სახელმწიფო სააგენტომ კომისია შექმნა, რომელსაც ამ შენობის საკითხი უნდა შეესწავლა, თუმცა მისი შედეგები დღემდე უცნობია. EMC-ის  სამოქალაქო და პოლიტიკური უფლებების პროგრამის დირექტორმა თამთა მიქელაძემ კომისიის მუშაობას არაეფექტური უწოდა, რადგანაც მას  არ მიუღია გადაწყვეტილება შენობის ისტორიული და კონფესიური მესაკუთრის დასადგენად.

 

მუსლიმების ლოცვა მოხეში სადაო შენობის გარეთ. მოხე, ადიგენი, საქართველო. 15/10/2016 ფოტო: სამხრეთის კარიბჭე

მუსლიმების ლოცვა მოხეში სადაო შენობის გარეთ. მოხე, ადიგენი, საქართველო. 15/10/2016 ფოტო: სამხრეთის კარიბჭე

მოვლენების ქრონოლოგია: 

  • ადიგენის რაიონის სოფელ მოხეში  ამჟამინდელი მკვიდრი მუსლიმი მოსახლეობა 1975-80 წლებში დასახლდა.  შენობაზე, რომლის დაბრუნებასაც მუსლიმები ითხოვენ, ამბობენ, რომ მეჩეთი სოფელ მოხეში 1927-34 წლებში მესხმა მუსლიმებმა ააშენეს. 1957 წლიდან შენობას კლუბის სტატუსი აქვს. საბჭოთა კავშირის დროს დიდი ხნის განმავლობაში  საწყობად, ბიბლიოთეკად და სოფლის კლუბად გამოიყენებოდა. 2007 წლიდან დღემდე კი შენობა  ადიგენის მუნიციპალიტეტის ბალანსზე ირიცხება.
  • მუსლიმმა თემმა ყოფილი მეჩეთის შენობის კონსერვაციის ან რესტავრაციის თხოვნით, 90-იანი წლებიდან მოყოლებული, ხელისუფლებას რამდენჯერმე მიმართა, თუმცა მათ თხოვნას რაიმე კონკრეტული შედეგი არ მოჰყოლია.
  • ვითარება მოხეში 2014 წელს დაიძაბა: 27 მაისს სოფელ მოხეს მოსახლეობამ ადგილობრივ ხელისუფლებას შენობის სამუფთო სამმართველოსთვის გადაცემის თხოვნით მიმართა.  8 ივლისს კი მუსლიმმა თემმა ადიგენის მუნიციპალიტეტის გამგებლის, ზაქარია ენდელაძისგან მიიღო წერილი (#1019), სადაც იგი აღნიშნავს, რომ სადავო ქონება ადგილობრივი თვითმართველობის ორგანომ მხოლოდ საჯარო ფუნქციებისა და უფლებამოსილების განხორციელების მიზნით შეიძლება გამოიყენოს.
  • 2014 წლის 18 ოქტომბერს სოფელში ტენდერში გამარჯვებული კომპანიის თანამშრომლები მივიდნენ და შენობის დემონტაჟი დაიწყეს, რაც ადგილობრივმა მუსლიმებმა გააპროტესტეს.  მშენებლებმა სოფელი მაშინვე დატოვეს, რასაც ქრისტიანი მოსახლეობის პროტესტი მოჰყვა. სოფლის ცენტრში შეკრებილი ქრისტიანები ამბობდნენ, რომ შენობის მუსლიმთა სამმართველოსთვის გადაცემასა და ამ ადგილას  მუსლიმური საკულტო ნაგებობის აშენებას არ დაუშვებდნენ.
  • სადავო შენობაზე პრეტენზიას საქართველოს საპატრიარქოც აცხადებს. ამის შესახებ ახალციხის, ტაო-კლარჯეთისა და ლაზეთის ეპარქიის მთავარეპისკოპოსის, მეუფე თეოდორეს განცხადებით,  XVI საუკუნეში აღნიშნულ ადგილას ქრისტიანული ტაძარი იყო, 1920-იან წლებში ეკლესიების ნგრევისა და მეჩეთების მშენებლობის შემდეგ კი, სადავო შენობის ადგილას მეჩეთის მშენებლობა დაიწყო.
  • 2014 წლის 22 ოქტომბერს სოფელ მოხეში მშენებლებმა მეჩეთის დემონტაჟი განაახლეს. მუსლიმების წინააღმდეგ, რომლებიც ხელისუფლების მოულოდნელ და რეპრესიულ გადაწყვეტილებას აპროტესტებდნენ, არასამთავრობო ორგანიზაციების შეფასებით, ხელისუფლებამ არაპროპორციული ძალა გამოიყენა და უხეშად დაარღვია მუსლიმთა უფლებები.
  • ინციდენტის დროს სოფელ მოხეში პოლიციამ 14 პირი დააკავა: 11 მათგანი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე მუხლებით (სამართალდამცავი ორგანოს თანამშრომლის  კანონიერი განკარგულებისადმი ან მოთხოვნისადმი დაუმორჩილებლობა) გათვალისწინებული ქმედებებისთვის,  ხოლო სამი პირი – სისხლის სამართლის კოდექსის 353-ე მუხლის მეორე ნაწილით გათვალისწინებული საზოგადოებრივი წესრიგის დამცველის, ან ხელისუფლების სხვა წარმომადგენლის მიმართ ჯგუფურად წინააღმდეგობის გაწევისთვს. 23 ოქტომბერს სასამართლომ სამი მუსლიმი – თეიმურაზ მიქელაზე, ოთარ მიქელაძე და მალხაზ ბერიძე ბრალის წარდგენის გარეშე გაათავისუფლა (თუმცა, გამოძიება გრძელდება),[10] ხოლო 11 დაკავებული სასამართლომ ადმინისტრაციულ სამართალდამრღვევად ცნო და თითოეულს 250 ლარი ჯარიმის გადახდა დააკისრა.
  • 2014 წელს რელიგიის სააგენტოსთან შეიქმნა კომისია, რომელსაც სადავო შენობის საკითხი უნდა შეესწავლა, თუმცა შედეგები ჯერჯერობით უცნობია.

ნეტგაზეთის მასალების სხვა გამოცემებში გადაბეჭდვის წესი
ავტორი