პარტია “სახელმწიფო ხალხისთვის” ოფისში საარჩევნო ბლოკის შექმნაზე ახალ მემარჯვენეებთან, გიორგი ვაშაძის პარტიასთან და გირჩთან მოლაპარაკება დასრულდა. პაატა ბურჭულაძის პარტია შიდა კონსტულტაციის შემდეგ, 18:00 საათზე გამოაცხადებს გადაწყვეტილებას.
“ჩვენ გვქონდა გაცნობითი ხასიათის შეხვედრა, ძალიან საინტერესო შეხვედრა იყო. ერთმანეთს აზრები გავუზიარეთ, ახლა კონსულტაციები გრძელდება და საღამოს მოგახსენებთ ყველაფერს. ძალიან ბევრი შეხების წერტილი გვაქვს და ეს არის ყველაზე ძალიან სასიამოვნო. ჩვენი გუნდი და მათი გუნდი ერთმანეთს გაეცნენ, ჩვენ ბევრი საერთო წერტილი მოვნახეთ, რაზეც მუშაობა შეიძლება და რითიც ჩვენს ქვეყანას შეიძლება ეშველოს. განცხადებას საღამოს გავაკეთებთ,” – განაცხადა პაატა ბურჭულაძემ.
ზურაბ ჯაფარიძის თქმით, “ახალ არჩევანში” შემავალ პარტიებს და “სახელმწიფო ხალხისთვის” რეალობის მსგავსი აღქმა აქვთ:
“რეალობას მსგავსად ვაფასებთ და ვხედავთ საფრთხეებს, რომელიც ქვეყნის წინაშე არსებობს. გამოსავალი ამ საფრთხეებიდან ის არის, რომ ქვეყანამ რაც შეიძლება სწრაფი სვლა უნდა გააგრძელოს ევროკავშირისკენ და ნატოსკენ. ასევე, ქვეყანაში გასატარებელია რადიკალური ეკონომიკური რეფორმები იმისათვის, რომ სიღარიბის დაძლევა მოხდეს. აქაც ხედვების დიდი ნაწილი ემთხვევა, ვილაპარაკეთ ჩვენს შორის განსხვავებებზეც.”
საარჩევნო ბლოკ “ახალი არჩევანის” ლიდერებმა ბურჭულაძის პარტიას “სახელწიფო ხალხისთვის” საჯარო შეთავაზება ერთიანი საარჩევნო ბლოკის შექმნის შესახებ 17 აგვისტოს საღამოს გაუკეთეს, თუმცა მოლაპარაკებები მანამდეც მიმდინარეობდა. 17 აგვისტოს ბურჭულაძის პარტია რამდენიმე წევრმა დატოვა. ერთ-ერთმა მათგანმა, იოსებ ხიმშიაშვილმა გუშინ ნეტგაზეთს განუცხადა, რომ მისი გადაწყვეტილების მიზეზი 2-თვიანი უხელფასობა და ბურჭულაძის პარტიის მხრიდან ენმ-სთან, გიორგი ვაშაძესთან და “გირჩთან” მოლაპარაკებები გახდა. ეს განცხადება მან “ახალი არჩევანის” ლიდერების განცხადებამდე გააკეთა.
- 2016 წლის 5 აგვისტოს “გირჩი”, “ახალი საქართველო” და “ახალი მემარჯვენეები” 2016 წლის საპარლამენტო არჩევნებისთვის გაერთიანდნენ და საარჩევნო ბლოკი “ახალი არჩევანი” შექმნეს;
- ნაციონალური მოძრაობის ერთ-ერთმა ლიდერმა გიორგი ვაშაძემ 2016 წლის მაისში დატოვა პარტია ენმ და 5 ივნისს პოლიტიკური პლატფორმა “ახალი საქართველო” დააარსა;
- 2015 წლის მაისში ნაციონალური მოძრაობა დატოვეს დეპუტატებმა ზურაბ ჯაფარიძემ, პავლე კუბლაშვილმა, გოგა ხაჩიძემ და გიორგი მელაძემ და პოლიტიკური გაერთიანება “გირჩი” დააარსეს;
- ცნობილმა საოპერო მომღერალმა პაატა ბურჭულაძემ 2016 წლის 28 მაისს დააფუძნა პარტია “სახემლმწიფო ხალხისთვის”.
- ბლოკში გაერთიანებული ყველაზე ძველი პარტია არის “ახალი მემარჯვენეები” — მემარჯვენე-ცენტრისტული პარტია, რომელიც 2000 წელს ფრაქციის სახით შეიქმნა საქართველოს პარლამენტში. 2001 წელს “ახალი ფრაქციის”, “ახალი მოძრაობისა” და “ახალი კონსერვატორების” ბაზაზე შეიქმნა პოლიტიკური გაერთიანება “ახალი მემარჯვენეები”, რომლის თავმჯდომარედაც ლევან გაჩეჩილაძე აირჩიეს, თანათავმჯდომარედ — დავით გამყრელიძე. 2012 წლის საპარლამენტო არჩევნებში “ახალმა მემარჯვენეებმა” ხმათა 1%-იც ვერ დააგროვა, რის გამოც პარტია დატოვა ლიდერმა – დავით გამყრელიძემ. 2013 წლის იანვრიდან პარტიის თავმჯდომარე იყო ფიქრია ჩიხრაძე – ამჟამად საქართველოს პრეზიდენტის მრჩეველი. 2015 წლის ოქტომბერში კი “ახალი მემარჯვენეების” თავმჯდომარედ მამუკა კაციტაძე აირჩიეს.
