საქართველოს პროკურატურამ თბილისის საქალაქო სასამართლოს გაცემული განჩინების საფუძველზე, სხვისი კუთვნილი დიდი ოდენობით უძრავი ქონების მითვისებისა და სხვისი კუთვნილი, დიდი ოდენობით ღირებული ქონებრივი უფლების გაფლანგვის ბრალდებით, ამხანაგობა „თაბუკაშვილი 88“-ს თავმჯდომარე ზურაბ თაბუკაშვილი დააკავა.

პროკურატურის ცნობით, ზურაბ თაბუკაშვილმა პირადი გამორჩენის მიღების განზრახვით, ამხანაგობის ინტერსების საწინააღმდეგოდ, შპს „ცენტრ პოინტ ჯგუფთან“ გააფორმა ხელშეკრულება, რომლის  მიხედვითაც, ამხანაგობის დამფუძნებელ წევრთა საცხოვრებელი ბინებით დასაკმაყოფილებლად გაიცემოდა 7250 კვ.მ. საცხოვრებელი და 100 კვ.მ. არასაცხოვრებელი ფართი. გარდა ამისა, შპს „ცენტრ პოინტ ჯგუფს” უნდა განეხორციელებინა საშუამავლო მომსახურება ამხანაგობაში სხვა პირთა გასაწევრიანებლად და საცხოვრებელი კორპუსის ასაშენებლად.

პროკურატურის ცნობით, ამხანაგობა „თაბუკაშვილი 88“-ს თავმჯდომარე ზურაბ თაბუკაშვილმა არათუ არ უზრუნველყო ამხანაგობის წინაშე დასახული მიზნის – სამშენებლო კომპლექსის მშენებლობის დასრულება და ექსპლუატაციაში მიღება, არამედ მისთვის მინიჭებული, ამხანაგობის ხელმძღვანელობითი უფლებამოსილება გამოიყენა ამხანაგობის წევრთა კუთვნილი ქონების მითვისებისა და გაფლანგვისთვის.

ამხანაგობის თავმჯდომარე ზურაბ თაბუკაშვილმა, ნაცვლად იმისა, რომ  2004-2016 წლების პერიოდში სხვადასხვა მობინადრის ფულადი შენატანი მიემართა მშენებლობის საჭიროებისთვის, ან საქართველოს სამოქალაქო კოდექსის  მოთხოვნის შესაბამისად, გაენაწილებინა ამხანაგობის წევრებს შორის, მართლსაწინააღმდეგოდ მიითვისა ცალკეული მობინადრის მიერ ინდივიდუალური ბინათმშენებლობის ამხანაგობა ,,თაბუკაშვილი-88“-ს ანგარიშზე შეტანილი ან პირადად ამხანაგობის თავმჯდომარე ზურაბ თაბუკაშვილისთვის გადაცემული დიდი ოდენობით ფულადი თანხა – 1 048 747 აშშ დოლარი და 219 950 ლარი, აცხადენს პროკუატურა.

პროკურატურა აღნიშნავს, რომ მიუხედავად იმისა, რომ ზურაბ თაბუკაშვილისთვის ცნობილი იყო მისი საქმიანობის თაობაზე წარმოებული გამოძიების შესახებ, იგი კვლავ აგრძელებდა დანაშაულებრივ საქმიანობას და მის მიერ ამხანაგობის ანგარიშზე შესული თანხის მითვისება განხორციელდა გამოძიების მიმდინარეობის პარალელურადაც,  2016 წლის იანვარშიც.

მანვე ამხანაგობა „თაბუკაშვილი 88“-ს დამფუძნებელ წევრთა მიერ მისაღები 7250 კვ.მ. საცხოვრებელი ფართიდან  სხვადასხვა პირებზე გაასხვისა ხუთი საცხოვრებელი ბინა, რითაც გაფლანგა ამხანაგობის დამფუძნებელ წევრთა დიდი ოდენობით ქონებრივი უფლება და ამხანაგობის წევრებს მოუსპო საცხოვრებელი ფართის მიღების სამართლებრივი საფუძველი., აცხადებს პროკურატურა.

ზურაბ თაბუკაშვილის მიმართ სისხლისსამართლებრივი დევნა დაწყებულია  საქართველოს სისხლის სამართლის კოდექსის 182-ე მუხლის მესამე ნაწილის „ბ“ ქვეპუნქტით (34 ეპიზოდი), რაც სასჯელის სახედ ითვალისწინებს თავისუფლების აღკვეთას შვიდიდან თერთმეტ წლამდე ვადით.