თურქული გამოცემის, “იენი შაფაკის” ცნობით, სტამბულის აეროპორტში თავდასხმის სავარაუდო ორგანიზატორი ჩეჩნური წარმოშობის ახმედ ჩატაევია. სამი თავდამსხმელიდან ერთ-ერთია ოსმან ვადინოვი, წარმოშობით ჩეჩენი, რუსეთის მოქალაქე. “როიტერსი” კი წერს, რომ თურქეთის ოფიციალური პირები არ ადასტურებენ ტერაქტთან ჩატაევის ან ვადინოვის კავშირს.

აჰმედ ჩატაევი 2012 წლის 28 აგვისტოს საქართველოში, ლოპოტის ხეობაში ჩატარებული სპეცოპერაციის (“ლაფანყურის სპეცოპერაციის”) შედეგად დაიჭირეს. სპეცოპერაციას ემსხვერპლნენ როგორც პოლიციელები, ისე იმ ჯგუფის წევრები, რომლებიც შსს-მ შეიარაღებული დივერსანტების ჯგუფად გამოაცხადა. 2012 წლის 6 დეკემბერს კი თბილისის საქალაქო სასამართლომ ახმედ ჩატაევს აღმკვეთი ღონისძიება პატიმრობა შეუცვალა 5000-ლარიანი გირაოთი და დარბაზიდან გაათავისუფლა. ჩატაევი, თურქული მედიის ცნობით, 2013 წელს შეუერთდა “დაეშს” (ე.წ “ისლამურ სახელმწიფოს”).

სტამბულის ათათურქის საერთაშორისო აეროპორტში 28 ივნისს განხორციელებული აფეთქებებისა და სროლის შედეგად დაიღუპა 42, დაშავდა 239-ზე მეტი ადამიანი. “ბიბისის” ცნობით, 28 ივნისს სამმა თავდამსხმელმა აეროპორტის ტერმინალის შიგნითა და გარეთა მხრიდან დაიწყო სროლა. მას შემდეგ, რაც პოლიციამ მათ ცეცხლი გაუხსნა,  თავი აიფეთქეს.

გამოცემა “იენი შაფაკი” წერს, რომ თურქეთის პოლიციის ინფორმაციით, სტამბულის აეროპორტზე სამი თავდამსხმელიდან ერთ-ერთი იყო ოსმან ვადინოვი, წარმოშობით ჩეჩენი, რუსეთის მოქალაქე. მან პირველმა აიფეთქა თავი. 

თურქეთის პრემიერ-მინისტრი ბინალი ილდირიმი ფიქრობს, რომ თავდასხმის უკან ტერორისტული დაჯგუფება “ისლამური სახელმწიფო” დგას.

“როიტერსი” კი წერს, რომ თურქეთის ოფიციალური პირები არ ადასტურებენ “როიტერსთან”, რომ ჩატაევი ან ვადინოვი გამოძიებაში ფიგურირებენ.