30 იანვარს თბილისში ავღანეთში საერთაშორისო უსაფრთხოების დახმარების ძალებისა (ISAF) და აშშ-ის ძალების მეთაური, გენერალი ჯონ ალენი შეხვედრებს გამართავს სამთავრობო და სამხედრო ოფიციალურ პირებთან.
ამ ინფორმაციას საქართველოში აშშ-ის საელჩო ავრცელებს.
შეხვედრებზე განიხილავენ საქართველოს წვლილს ავღანეთში მშვიდობისა და სტაბილურობის საკითხებში. გენერალი, აგრეთვე, მოინახულებს და სიტყვით მიმართავს საქართველოს 23-ე მსუბუქ ქვეით ბატალიონს კრწანისის საწვრთნელ ცენტრში. ამჟამად მიმდინარეობს ბატალიონის მომზადება ავღანეთის ოპერაციებში მონაწილეობის მისაღებად.
ავღანეთში საერთაშორისო უსაფრთხოების დახმარების ძალებისა და აშშ-ის ძალების მეთაურის პოსტზე დანიშვნამდე გენერალი ჯონ ალენი მსახურობდა აშშ-ის ცენტრალური სარდლობის მეთაურის მოადგილის თანამდებობაზე.
ავღანეთში ISAF-ის მეთაური მოქმედებს გაერთიანებული ერების ორგანიზაციის მანდატით, რომელიც სხვადასხვა ოპერაციების საშუალებით ხელს უწყობს ავღანეთის ისლამური რესპუბლიკის მთავრობას, შეამციროს მეამბოხეთა შესაძლებლობები, დაეხმაროს ავღანეთის ეროვნული უსაფრთხოების ძალების განვითარებასა და მმართველობის დახვეწას, აგრეთვე, სოცილაურ-ეკონომიკური მდგომარების გამოსწორებას.
