საქართველოს საგარეო საქმეთა სამინისტროს ცნობით, საქართველოს დამოუკიდებლობის აღდგენის 25 წლისთავის აღსანიშნავად მსოფლიოს სხვადსახვა ქვეყანაში საქართველოს დროშის ფერებში განათდა და ეროვნული სიმბოლიკებით მოირთო ქალაქების ღირშესანიშნაობები.  

სამინისტროს ინფორმაციით, 26 მაისის დღესასწაულთან დაკავშირებით ქართული დროშის ფერებში განათდა: ავსტრალიის ძველი პარლამენტის შენობა, უნგრეთის „ერჟებიტის“ ხიდი, სლოვაკეთის ქალაქ კოშიცეს მუნიციპალიტეტის შენობა, ლიუბლიანის ციხესიმაგრე, საუდის არაბეთში რიადის ყველაზე მაღალი შენობა „Kingdom Tower“,   ესტონეთის ბიზნესცენტრი, რომელშიც მდებარეობს საქართველოს საელჩო.

 

თურქეთის ქალაქ სტამბოლში საქართველოს დროშის ფერებით განათდა ბოსფორის ხიდი.

კვიპროსსა და ინდონეზიაში – დედაქალაქის ტურისტული ცენტრები.

ლიტვაში საქართველოს დროშის ფერებში განათდა კაუნასის ცენტრალური ღირშესანიშნაობა – ქრისტეს აღდგომის ტაძარი, ასევე საქართველოს გიგანტური დროშა გამოიფინა ქ. ვილნიუსის ცენტრალურ ადგილზე, მდინარე ნერისის სანაპიროზე.​

საბერძნეთში გაუშვეს საქართველოს დროშის ფერებით მოხატული საჰაერო ბურთები. კანადაში, მერიის წინ აღიმართა საქართველოს დროშა. ყაზახეთის დედაქალაქ ასტანის მასშტაბით განთავსებულ ბანერებზე გამოსახეს საქართველოს სახელმწიფო სიმბოლოები.  ირლანდიის დედაქალაქ დუბლინის ცენტრში 25-დან 30 მაისის ჩათვლით გამოიფინა საქართველოს დროშები.

ბელგიაში, დედაქალაქ ბრიუსელის მთავარი სიმბოლო „მანეკენ პისი“ შეიმოსა ქართულ ეროვნულ სამოსში.

მოლდოვაში, კიშინოვის ცენტრში განათდა ტრიუმფალური თაღი. ბრაზილიაში, კორკოვადოს მთაზე, მსოფლიო დროშების ხეივანში, საქართველოს დამოუკიდებლობის დღის აღსანიშნავად აღიმართა საქართველოს დროშა.