აზერბაიჯანელი ჟურნალისტი და უფლებადამცველი ხადიჯა ისმაილოვა აზერბაიჯანის უზენაესმა სასამართლომ დღეს, 25 მაისს პატიმრობიდან გაათავისუფლა . უზენაესი სასამართლოს გადაწყვეტილება აზერბაიჯანში საყოველთაო ამნისტიის დაწყებამდე 3 დღით ადრე გახდა ცნობილი.
სასამართლომ ხადიჯა ისმაილოვას პატიმრობა 3 წლითა და 6 თვით პირობითი სასჯელით შეუცვალა. ის ამჟამად კოლონიაშია, თუმცა სასამართლოს გადაწყვეტილებით მალევე უნდა გაათავისუფლონ.
ისმაილოვა 2014 წლის 5 დეკემბერს დააკავეს. საგამოძიებო ჟურნალისტიკაში მრავალი პრიზის მფლობელსა და რადიო თავისუფლების კონტრიბუტორს ბაქოს სასამართლომ 7.6 წლით თავისუფლების აღკვეთა მიუსაჯა.
2012 წელს ხადიჯა ისმაილოვა “ცაიტის ფონდმა” (Zeit Stiftung) და „გამოხატვის თავისუფლების ფონდმა” (Fritt Ord Foundation) დააჯილდოვეს გერდ ბუცერიუსის პრემიით აღმოსავლეთ ევროპაში თავიუფალი პრესის განვითარებისთვის. მას სხვა ბევრი ჯილდოც აქვს მიღებული, როგორც მამაც და პატივსაცემ ჟურნალისტს. მან არაერთი სტატია გამოაქვეყნა აზერბაიჯანში კორუფციის შესახებ “ორგანიზებული კრიმინალისა და კორუფციის გაშუქების პროექტის” (OCCRP) ფარგლებში. სულ ბოლოს მუშაობდა აზერბაიჯანის არასამთავრობო ორგანიზაციების მიერ შედგენილი სიის კონსოლიდაციაზე, რომელშიც 100-მდე პოლიტიკური პატიმარია თავმოყრილი.