თავდაცვის სამინისტრო სწავლობს, ნამდვილად მონაწილეობდა თუ არა რიგითი ლაშა დვალიშვილი ზუგდიდის რაიონის სოფელ კორცხელში, საარჩევნო უბანთან მომხდარ ძალადობაში. ინფორმაცია ინციდენტში მის მონაწილეობაზე ერთიანმა ნაციონალურმა მოძრაობამ გაავრცელა.
საქართველოს შეიარაღებული ძალების 32-ე ქვეითი ბატალიონის მე-3 ბრიგადის პირველი კლასის რიგითი ლაშა დვალიშვილი სპორტის ორ სახეობაში – MMA წესებით ორთაბრძოლაში და გრამპლინგში მსოფლიო ჩემპიონია. მან ეს ტიტული 3 მარტს იტალიის ქალაქ მილანში WFC ვერსიით სპორტის არაოლიმპიურ სახეობებში ჩატარებულ მსოფლიო თამაშებზე მოიპოვა. ამის შესახებ სიუჟეტი 20 აპრილს თავდაცვის სამინისტროს ოფიციალურ ფეისბუკ-გვერდზეა გამოქვეყნებული.
22 მაისს ნაციონალურმა მოძრაობის დეპუტატმა ჩიორა თაქთაქიშვილმა გაავრცელა ინფორმაცია იმის შესახებ, რომ დვალიშვილი კორცხელში, საარჩევნო უბანთან მომხდარი ძალადობის ერთ-ერთი მონაწილეა. როგორც თავდაცვის სამინისტროში ნეტგაზეთს განუცხადეს, ისინი ამ ინფორმაციას სწავლობენ:
“მინისტრის უშუალო დავალებაა და პირადად ვარ ჩართული… ყველა ვიდეოს ვნახულობთ, რომ [შევამოწმოთ] სადმე არის თუ არა ეს ადამიანი”, – გვითხრა მინისტრის მრჩეველმა მედიის საკითხებში იმედა დარსალიამ. მისი თქმით, თუ ინციდენტში სამხედრო მოსამსახურის მონაწილეობის ფაქტი დადასტურდა, ამ საკითხზე სადისციპლინო კომისია იმსჯელებს, თუმცა უცნობია შესაძლო გადაწყვეტილების შინაარსი:
“მე არ ვიცი, სადისციპლინო კომისია რა გადაწყვეტილებას მიიღებს [ფაქტის დადასტურების შემთხვევაში], მაგრამ ყველა ვარიანტში, ეს ძალიან ცუდი ფაქტი იქნება და ამას მოჰყვება ძალიან სერიოზული რეაგირება”, – ამბობს იმედა დარსალია.
22 მაისს ზუგდიდის რაიონის სოფელ კორცხელის 53-ე საარჩევნო უბანთან ნაციონალური მოძრაობის წევრები ნიკა მელია, გიგა ბოკერია და კიდევ რამდენიმე წევრი ცემეს. შსს-მ გამოძება ცემის მუხლით დაიწყო (სსსკ-ს 125-ე მუხლი), თუმცა ჯერჯერობით არავინ დაუკავებიათ.
22 მაისს საკრებულოს შუალედეური არჩევნები გაიმართა 9 მაჟორიტარული ოლქის 45 საარჩევნო უბანზე. “ერთიანი ნაციონალური მოძრობის” კანდიდატები 9 ოლქიდან 4-ში მონაწილეობდნენ, აქედან ორში- ოზურგეთსა და ზუგდიდში არჩევნები მოიგეს, ხოლო 2-ში – წყალტუბოსა და კასპში წააგეს.