ახალი ამბები

“თავისუფალი დემოკრატების” აქციას საპარლამენტო და არასაპარლამენტო პარტიები შეუერთდნენ

21 მაისი, 2016 • 1651
“თავისუფალი დემოკრატების” აქციას საპარლამენტო და არასაპარლამენტო პარტიები შეუერთდნენ

“თავისუფალი დემოკრატების” ორგანიზებით საქართველოს მთავარ პროკურატურასთან თავდაცვის სამინისტროს ყოფილი მაღალჩინოსნების მხარდამჭერი აქცია მიმდინარეობს. დღევანდელ აქციას შეუერთდნენ როგორც საპარლამენტო, ასევე არასაპარლამენტო პარტიების წარმომადგენლები.

“ბიძინა ივანიშვილის რეჟიმი არის მოძალადე რეჟიმი. ეს ადამინები [თავდაცვის სამინისტროს ყოფილი მაღალჩინოსნები] არიან ივანიშვილის პირადი პოლიტპატიმრები. ჩვენ მათ ვუცხადებთ სოლიდარობას. ჩვენი ვალდებულებაა, ჩვენი პასუხისმგებლობაა ყველაფერი გავაკეთოთ იმისთვის, რომ ეს ადამიანები ციხიდან დავიხსნათ. ჩვენ ისეთი გარემო უნდა შევქმნათ, რომ ქვეყანაში პოლიტიკური პატიმრები აღარ იყვნენ,” – ამბობს სერგო რატიანი, “ნეციონალური მოძრაობის” ერთ-ერთი ლიდერი.

აქციას ასევე შეუერთდა საპარლამენტო უმრავლესობის წევრი “რესპუბლიკური პარტია”. ფრიდონ საყვარელიძის განცხადებით, ყოფილი მაღალჩინოსნები უსამართლოდ არიან დაკავებული:

“როგორც კი ეს საქმე დაიწყო, რესპუბლიკელებმა მაშინვე აღვნიშნეთ, რომ პოლიტიკურ შემადგენელს ვხედავთ. ბოლოდროინდელმა მოვლენებმა, იმ კლიპმა, რომელიც  სასამართლოს გადაწყვეტილების გამოცხადებიდან რამდენიმე წუთში გამოჩნდა, ბატონი შოთაძის განცხადებებმა და ასევე კომპეტენტური არასამთავრობო ორგანიზაციების დასკვნებმა და ადვოკატების განცხადებებმა კიდევ უფრო გამიმყარა ეჭვი, რომ ეს ადამიანები უსამართლოდ არიან დაკავებული. ”

ყოფილ მაღალჩინოსნებს სოლიდარობა გამოუცხადა პაატა ბურჭულაძის პარტიამ “სახელმწიფო ხალხისთვის.”

“ყველაზე სამწუხარო, რაც ქვეყანაში ხდება, არის ის, რომ ნაციონალკური მოძრაობის” დამარცხებიდან ოთხი წლის თავზე ჩვენ ისევ გვიწევს ქუჩაში გამოსვლა უკანონო პატიმრებისთვის სოლიდარობის გამოსაცხადებლად,” – განაცხადა მერაბ მეტრეველმა.

 

16 მაისს თბილისის საქალაქო სასამართლოს მოსამართლე ბესიკ ბუგიანიშვილმა სახელმწიფოს კუთვნილი 4 მილიონ ლარზე მეტის გაფლანგვაში ბრადებულ თავდაცვის სამინისტროს მაღალჩინოსნებს: გიზო ღლონტს, ნუგზარ კაიშაურს, გიორგი ლობჟანიძეს, არჩილ ალავიძესა და დავით წიფურიას 7-7 წლით თავისუფლების აღკვეთა მიუსაჯა და 2 წლის ვადით საჯარო სამსახურში თანამდებობის დაკავების უფლება ჩამოართვა.

საქართველოს მთავარმა პროკურატურამ თავდაცვის სამინისტროს ხუთი მაღალჩინოსანი სახელმწიფოს კუთვნილი 4 102 000 ათასი ლარის გაფლანგვის ბრალდებით 2014 წლის 28 ოქტომბერს დააკავა, ხოლო 30 ოქტომბერს ყველა მათგანს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. საუბარია თანხის კომპანია “სილქნეტის” სასარგებლოდ გაფლანგვის საქმეზე.

დაკავებულთა შორის იყვნენ: თავდაცვის სამინისტროს სახელმწიფო შესყიდვების დეპარტამენტის უფროსი გიზო ღლონტი; საქართველოს შეიარაღებული ძალების გაერთიანებული შტაბის J-6 კავშირგაბმულობისა და ინფორმაციული ტექნოლოგიების დეპარტამენტის უფროსი ნუგზარ კაიშაური; საქართველოს თავდაცვის სამინისტროს სახელმწიფო შესყიდვების დეპარტამენტის სამმართველოს უფროსი გიორგი ლობჟანიძე; საქართველოს თავდაცვის სამინისტროს სახელმწიფო შესყიდვების დეპარტამენტის მთავარი სპეციალისტი არჩილ ალავიძე და საქართველოს შეიარაღებული ძალების გაერთიანებული შტაბის J-6 კავშირგაბმულობისა და ინფორმაციული სისტემების დეპარტამენტის სამმართველოს უფროსი დავით წიფურია.

სილქნეტმა, თავდაცვის სამინისტროს მაღალჩინოსნების დაკავების შემდეგ, იმავე დღეს დაადასტურა, რომ მათ 2013 წლის შემოდგომაზე მონაწილეობა მიიღო საქართველოს თავდაცვის სამინისტროს მიერ გამოცხადებულ სადავო ტენდერში. კომპანიამ განაცხადა, რომ ტენდერის ყველა ეტაპზე სილქნეტის წარმომადგენელთა ქმედებები იყო შესაბამისობაში სამართლებრივ და ტენდერის პირობებით განსაზღვრულ ნორმებთან.

თავდაცვის სამინისტროს მაღალჩინოსნების დაკავებას იმდროინდელმა თავდაცვის მინისტრმა ირაკლი ალასანიამ “თავისუფალი დემოკრატების” ოფისში გამართული სპეციალური ბრიფინგით უპასუხა. მან პროკურატურის ქმედებებში “პოლიტიკური სარჩული” შენიშნა და თქვა, რომ ადგილი აქვს “შეტევას საქართველოს ევროატლანტიკურ არჩევანზე“. ალასანიას თქმით, თავდაცვის უწყების თანამშრომლების დაკავება ზუსტად მაშინ განხორციელდა, როდესაც ის მინისტრის რანგში ევროპაში ვიზიტს მართავდა საქართველოს თავდაცვისუნარიანობის ამაღლების მიზნით. ალასანიამ მოგვაინებით განმარტა, რომ იგი ევროპაში საქართველოსთვის ანტისაჰაერო თავდაცვითი იარაღის შესყიდვის შესაძლებლობებზე საუბრობდა. ამის შემდეგ მინისტრის თანამდებობები დატოვეს მაია ფანჯიკიძემ და ალექსი პატრიაშვილმა. საბოლოოდ კი, თავისუფალმა დემოკრატებმა კოალიცია “ქართული ოცნება” დატოვეს.

მასალების გადაბეჭდვის წესი