მავნე მწერები მერქნიან მცენარეებზე გავრცელდნენ.
გარემოს დაცვის სამინისტროს ცნობით, სპეციალისტების მიერ შესწავლის შედეგად დადგინდა მწერების სახეობა: მზომელები – ცქვლეფია (Erannis defoliaria) და მოზამთრე – (Operophtera brumata)
სამინისტრო აცხადებს, რომ მზომელები ერთწლიანი დასახლებით არ იწვევენ ფოთლოვანი ხეების ხმობას. მათი კერა საშიში ხდება, თუ 2-3 წლის განმავლობაში გამოიწვიეს ხე- მცენარეების 80%-ზე მეტი დეფოლაცია.
“ასევე, აღნიშნული მწერები, მათი ბიოლოგიიდან გამომდინარე, მაისის ბოლოსთვის ჩადიან მიწაში დასაჭუპრებლად და, შესაბამისად, აღარ წარმოადგენენ საფრთხეს როგორც ტყის შემქმნელი სახეობებისათვის, ასევე, ხეხილისთვის”, – ნათქვამია გარემოს დაცვის სამინისტროს პრეს რელიზში, რომელიც 4 ივნისს გაავრცელეს.
სამინისტროს ცნობით, ეროვნული სატყეო სააგენტოს მიერ განხორციელდება მუდმივი მონიტორინგი, ხოლო მომავალი წლის გაზაფხულის დადგომისთანავე, მწერების განმეორებით გამოვლენის შემთხვევაში, განხორციელდება მათთან ბიოპრეპარატებით ბრძოლის ღონისძიებები.