საქართველოს მთავარი პროკურატურის ცნობით, ირაკლი შოთაძემ შიდა საკადრო ცვლილებები განახორციელა. ცვლილებები ძირითადად საოლქო და რაიონული პროკურატურების ხელმძღვანელებს შეეხო.
პროკურატურის ცნობით, შეიცვალა რამდენიმე ოლქის და რაიონული პროკურორი და მოადგილეები: აჭარის ავტონომიური რესპუბლიკის პროკურორად ლევან პაქსაშვილი, დასავლეთ საქართველოს საოლქო პროკურორად ავთანდილ კოჭლამაზაშვილი, ქვემო ქართლის საოლქო პროკურორად ლევან გეგეჭკორი, შიდა ქართლისა და მცხეთა-მთიანეთის საოლქო პროკურორად შოთა ტყეშელაშვილი, სამეგრელო-ზემო სვანეთის საოლქო პროკურორად ილია ჯალაღანია დაინიშნენ.
რაც შეეხება თბილისის პროკურატურას და სხვა რაიონულ პროკურატურებს, შიდა საკადრო გადაადგილებების შედეგად თბილისის პროკურორის მოადგილედ-საგამოძიებო ნაწილის უფროსად მერაბ ჯერანაშვილი დაინიშნა, ექვსი პირი – სხვადასხვა რაიონულ პროკურორად, ხოლო ორი – რაიონული პროკურორის მოადგილედ.
პროკურატურის მიერ გავრცელებულ განცხადებაში აღნიშნულია, რომ საკადრო ცვლილებები მთავარ პროკურატურასაც შეეხო და რამდენიმე დეპარტამენტის უფროსები და მოადგილები შეიცვალნენ. უწყების ცნობით, განხორციელებული ყველა ცვლილება პროკურატურის ოფიციალურ ვებ-გვერდზე განთავსდება.
გარდა ამისა, გაიმართა საკონსულტაციო საბჭოს სხდომა, სადაც ოთხი რიგითი პროკურორი დააწინაურეს და სხვადასხვა თანამდებობაზე დანიშნეს.
პროკურატურის განცხადებით, საკადრო ცვლილებების შედეგად თანამდებობებზე, საერთო ჯამში, ოცდაათი პირი დაინიშნა.