დღეს, 1 თებერვალს, მართლმსაჯულების სახლში საქართველოს მოსამართლეთა XVI რიგგარეშე კონფერენცია ჩატარდება.
როგორც დღის წესრიგში არის აღნიშნული, კონფერენციაზე მოსამართლეებს გააცნობენ სადისციპლინო კოლეგიის საქმიანობისა და განხილული დისციპლინური საქმეების შესახებ სტატისტიკურ ინფორმაციას; ასევე, განიხილავენ სასამართლოსა და იუსტიციის უმაღლესი საბჭოს ირგვლივ განვითარებულ მოვლენებს.
კონფერენციის პარალელურად შესაძლოა გაიმართოს საპროტესტო აქციაც, სადაც სააპელაციო სასამართლოს მოსამართლედ ლევან მურუსიძის დანიშნვას გააპროტესტებენ. აქცია საქართველოს ადვოკატთა ასოციაციის თავმჯდომარემ, ზაზა ხატიაშვილმა დააანონსა.
“რამოდენიმე დღეში გასდით ვადა ზაზა მეიშვილს და თამარ ალანიას, რომლებიც ბრძანდებიან იუსტიციის საბჭოს წევრები. სავარაუდოდ, მოქმედი იუსტიციის საბჭო მათაც გადანიშნავს, თუ სამოქალაქო საზოგადოება არ დადგა ფეხზე. გელოდებით ადვოკატებს! რათა ერთად გავაპროტესტოთ უსამართლობა,”– წერს ზაზა ხატიაშვილი.