სამინისტროს განცხადების მიხედვით, მსჯავრდებული კახაბერ ბარათაშვილი გაასამართლეს 2006 წლის 24 მარტს და სასჯელად დააკისრეს 8 წლით თავისუფლების აღკვეთა. ის სასჯელს 2006 წლის 24 დეკემბრიდან რუსთავის #17 ნახევრად ღია ტიპის თავისუფლების აღკვეთის დაწესებულებაში იხდიდა.
კალმახელიძის უწყების ცნობით, 2011 წლის 26 ნოემბერს, სამედიცინო საჭიროებებიდან გამომდინარე, ინტენსიური მკურნალობის მიზნით, მსჯავრდებული გადაიყვანეს #18 მსჯავრდებულთა და ბრალდებულთა სამკურნალო დაწესებულებაში, სადაც 30 ნოემბერს ჩაუტარდა ქირურგიული ოპერაცია. როგორც ოფიცალურ განცხადებაში წერია, ამჟამად პაციენტის ჯანმრთელობის მდგომარეობა დამაკმაყოფილებელია და იმყოფება მედპერსონალის მუდმივი ზედამხედველობის ქვეშ.
“უნდა აღინიშნოს, რომ ამავდროულად, ბრალდებულთა და მსჯავრდებულთა სამკურნალო დაწესებულების ადმინისტრაციის შეტყობინების საფუძველზე, საქართველოს სსკ 118-ე მუხლის პირველი ნაწილით, 2011 წლის 2 დეკემბერს საქართველოს საჯელაღსრულების, პრობაციისა და იურიდიული დახმარების საკითხთა სამინისტროს საგამოძიებო დეპარტამენტში დაიწყო გამოძიება და დაინიშნა სასამართლო-სამედიცინო ექსპერტიზა. ამჟამად საქმეზე მიმდინარეობს გამოძიება.
ყოველივე ზემოაღნიშნულიდან გამომდინარე, სამინისტროსათვის განსაკუთრებით მნიშვნელოვანია თითეული ბრალდებულის/მსჯავრდებულის უფლებების განუხრელი დაცვა და ისევე, როგორც ყველა სხვა შემთხვევაში, ზემოაღნიშნულ საკითხთან დაკავშირებით საბოლოო პოზიციას სამინისტრო დააფიქსირებს გამოძიების დასრულებისთანავე,” – წერია ხათუნა კალმახელიძის უწყების განცხადებაში.
კახაბერ ბარათაშვილის ადვოკატმა კახა მუმლაძემ 2011 წლის 29 ნოემბერს მიმართა საქართველოს ახალგაზრდა იურისტთა ასოციაციას. ადვოკატის განცხადებით, მისი დაცვის ქვეშ მყოფის მიმართ ფიზიკური და ფსიქოლოგიური ზეწოლა ხორციელდებოდა. როგორც ადვოკატი ამტკიცებდა, კახაბერ ბარათაშვილი სასტიკად ცემეს სამკურანლო დაწესებულების თანამშრომლებმა. 7 დეკემბერს აღნიშნულ საქმესთან დაკავშირებით ახალგაზრდა იურისტთა ასოციაციამ განცხადება გაავრცელა, სადაც წერია, რომ მსჯავრდებულზე ზეწოლის ფაქტი კვლავ განმეორდა. ფაქტს გამოეხმაურა საქართველოს სახალხო დამცველი გიორგი ტუღუში.
უფლებადამცველებმა პროკურატურას გამოძიების დაწყება, ციხის სამკურნალო დაწესებულებას მსჯავრდებულის უსაფრთხოების უზრუნველყოფა, სასჯეალღსრულების დეპარტამენტს კი შესაბამისი რეაგირება მოსთხოვეს.
საქართველოს სასჯელაღსრულების, პრობაციისა და იურიდიული დახმარების საკითხთა სამინისტრომ დღესვე მეორე განცხადება გაავრცელა მსჯავრდებულ მურმან კალანდიათან დაკავშირებითაც. ის ქუთაისის მეორე სამკურნალო დაწესებულებაში 2011 წლის 31 ოქტომბერს გარდაიცვალა. საქართველოს სახალხო დამცველის ინფორმაციით, „ადგილი ჰქონდა ავადმყოფი პატიმრისადმი დანაშაულებრივ გულგრილობას ზუგდიდის N4 და ქუთაისის N2 დაწესებულებების სამედიცინო პერსონალის და, ზოგადად, ადმინისტრაციის მხრიდან.” ამის გამო გიორგი ტუღუშმა საქართველოს მთავარ პროკურატურას მიმართა გამოძიების დაწყებისა და დამნაშავე პირების გამოვლენის მოთხოვნით.
საია პატიმარზე განმეორებით განხორციელებული ზეწოლის შესახებ
ომბუდსმენი ზუგდიდისა და ქუთაისის ციხეების თანამშრომლების დასჯას მოითხოვს