მთავარ სცენაზე პირველი ქართული პოპ-პანკ ბენდი Ducktape გამოჩნდა. ბენდის გამოსვლა ფესტივალის პირველ დღეს იყო დაგეგმილი, თუმცა მცირე ხარვეზებისა და დროში შეზღუდული განრიგის გამო ბიჭებს სცენაზე დადგომის საშუალება 6 ივნისს მიეცათ. მათ შემდეგ კიდევ ერთი ქართული ბენდი JetBird წარსდგა მსმენელის წინაშე. დათო ლომიძისა და ტონის დუეტი ქართველი აუდიტორიისათვის უკვე კარგად ნაცნობია და მსმენელებს მათთან ერთად სიმღერაზეც არ უთქვამთ უარი. 

შემდეგ სცენაზე კვლავ ქართული Salio და Me and My Monkey ავიდნენ. ნელ-ნელა ამინდიც გაუარესდა და ბეთ ჰარტის მოლოდინში სცენის წინ შეკრებილი გულშემატკივრები რამდენჯერმეც კი დასველდნენ. წვიმასა და ქარს არ შეუშინდნენ არც Kill it Kid-ის მოსასმენად მოსული ფესტივალის სტუმრები 

ბეთ ჰარტის გამოსვლა მეოთხე დღის დასკვნითი ნაწილი უნდა ყოფილიყო მთავარ სცენაზე, თუმცა ლაინაფში ბრიტანულმა ბენდმა და ამერიკელმა მომღერალმა გამოსვლის დროები გაცვალეს. მსმენელის წინაშე ჯერ ჰარტი და შემდეგ უკვე Kill It Kid წარდგნენ.  ბეთ ჰარტს ქართველი მელომანები უკვე კარგად იცნობენ. ეს მისი რიგით მეორე ვიზიტია საქართველოში.  ბეთის ჰარტის გამოსვლის შემდეგ აუდიტორია საგრძნობლად შეთხელდა. 

Kill It Kid 2008 წლიდან არსებობს. ამ დრომდე 4 სტუდიური ალმობის ჩაწერა შეძლეს. 2009 წელს ბენდის პირველი ალბომი წლის საუკეთესო ახალი აქტის ნომინაციაში რამდენიმე მნიშვენლოვანი გამოცემისა და მუსიკალური ჯილდოს ნომინანტებში მოხვდა. 2010 წელს კი XFM-მა Kill It Kid-ს “ახალი მუსიკის” ჯილდო გადასცა.

დღეს ფესტივალის ბოლო დღეა. დაახლოებით 23:40 საათზე სცენაზე ბრიტანული ბენდის Placebo გამოჩენას ელიან.