Bloomberg-ის მიერ შედგენილ რეიტინგში Global Risk Briefing საქართველო ინვესტიციების განხორციელების თვალსაზრისით მაღალი რისკის შემცველ ქვეყნებს შორის მოხვდა.
რეიტინგში, რომელიც 0-დან 100 ქულამდე ვარირებს, საქართველომ 11.6 ქულა დაიმსახურა. რეიტინგს ნორვეგია ლიდერობს 96.5 ქულით, მეორეზე შვეიცარიაა, მესამეზე – შვედეთი.
საქართველო ბლუმბერგის რეიტინგის მიხედვით, ინვესტორებისთვის უფრო რისკის შემცველი ქვეყნაა (ინვესტირებისთვის), ვიდრე ამ რეგიონის ის ქვეყნები, რომლებიც ამ ინდექსში მოხვდნენ, მაგალითად, რუსეთი, თურქეთი და უკრაინა – ყველა მათგანი საქართველოზე წინაა.
ბლუმბერგი წერს, რომ ქვეყნის რისკის ქულა გამოითვლება 29 ინდიკატორისგან, რომლებიც წარმოადგენს იმ ფინანსურ, პოლიტიკურ და ეკონომიკურ რისკებს, რომლებსაც ინვესტორები აწყდებიან. რისკის ქულები ითვლება ყოველთვიურად 0-დან 100-მდე, სადაც უმაღლესი ქულა ქვეყნის დაბალ რისკიანობას მიუთითებს.
ვებგვერდზე ბლუმბერგს მხოლოდ 4 ასეთი ფაქტორი აქვს მითითებული სარეზერვო მარაგები (მისი პროცენტი მშპ-სთან მიმართებაში), უმუშევრობის დონე ქვეყანაში, ინფლაციის მაჩვენებელი და ვალუტის ვოლატილობა (არამდგრადობა).
აღსანიშნავია, რომ საქართველოს ჯამური ქულის გამოსათვლელად ბლუმბერგს ვალუტის ვოლატილობა არ გამოუკვლევია, ყოველ შემთხვევაში ვებგვერდზე ასეთი რამ მითითებული არ აქვს.