კომენტარი

დვალის და აქიმიძის განცხადება რ2-ზე სააპელაციო სასამართლოს გადაწყვეტილებაზე

1 დეკემბერი, 2015 • 1862
დვალის და აქიმიძის განცხადება რ2-ზე სააპელაციო სასამართლოს გადაწყვეტილებაზე

20 ნოემბერს სააპელაციო სასამართლოს სამოქალაქო საქმეთა პალატის განჩინებით გაუქმდა რუსთავი 2-ის დროებითი მმართველის დანიშვნის გადაწყვეტილება. სასამართლოს ზემოაღნიშნულ გადაწყვეტილებასთან დაკავშირებით რუსთავი 2-ის დამფუძნებლები დავით დვალი და ჯარჯი აქიმიძე განცხადებას ავრცელებენ, რომელსაც უცვლელად გთავაზობთ:

1. როგორც კანონმორჩილი მოქალაქეები, ვემორჩილებით სასამრთლოს გადაწყვეტილებას. მიგვაჩნია, რომ დემოკრატიულ საზოგადოებაში მხოლოდ დამოუკიდებელი სასამრთლოს განჩინება მოითხოვს აღსრულებას, მიუხედავად იმისა, ეთანხმება თუ არა მას ერთ-ერთი მხარე.

2. ჩვენი თანხმობა, დავნიშნულიყავით დროებითი მმართველის თანამდებობაზე, განაპირობა რუსთავი 2 -ის ირგვლივ შექმნილმა რთულმა ვითარებამ – ინფორმაციამ მოსალოდნელი არეულობის, დესტაბილიზაციისა და ბარიკადების აღმართვის შესახებ. მიგვაჩნია, რომ დაუშვებელია ჩვენი ყოფილი და მომავალი თანამშრომლების გამოყენება ნებისმიერი სახის პოლიტიკურ პროვოკაციაში.

3. ამ დაძაბულ ფონზე, პირველ ინსტანციაში ქიბარ ხალვაშის მიერ მოგებულმა პროცესმა დააჩქარა ჩვენ შორის სამომავლო მოლაპარაკება. მომავალი პარტნიორისგან მივიღეთ წინადადება – სასამართლო პროცესის სრულად და წარმატებით დასრულების შემდეგ კომპანიის 50 პროცენტის მფლობელობა და დირექტორის პოსტი. მიგვაჩნია, აღნიშნული შემოთავაზება სრული გარანტიაა იმისა, რომ მომავალში რუსთავი 2 გახდება დამოუკიდებელი, არაპარტიული და კრიტიკული მედიასაშუალება, რომლის ფუნქციონირების პრინციპები ჩვენ ერთობლივად ჩამოვაყალიბეთ ამა წლის 6 ნოემბერს გამართულ პრესკონფერენციაზე.

4. მიუხედავად გაუქმებული დროებითი მმართველის სტატუსისა, თავს მოვალედ ვთვლით მომავალში აქტიური მონაწილეობა მივიღოთ რუსთავი 2-ის ირგვლივ განვითარებულ ნებისმიერ პროცესში, რათა ხელი შევუწყოთ სამართლიანობის სრულ აღდგენას.

5. ჩვენ, რუსთავი 2-ის კანონიერი მფლობელები, რომლებსაც 2004 წელს მაშინდელმა ხელისუფლებამ იძულებით და ზეწოლით, ჩვენი ნების საწინააღმდეგოდ დაგვათმობინა ტელევიზიის საკონტროლო პაკეტი, გადააქცია ქვეყნის ნომერ პირველი მედიასაშუალება ნაცმოძრაობის პოლიტიკურ იარაღად და პროპაგანდისტულ მანქანად, ყველა კანონიერ უფლებას გამოვიყენებთ, რომ ჩვენი დაბრუნებით ტელევიზიას, მის ჟურნალისტურ, შემოქმედებით და ტექნიკურ შემადგენლობას მიეცეს საშუალება რეალურად შეასრულოს მასზე დაკისრებული რთული, მაგრამ საპატიო ამოცანა – ქვეყნის დემოკრატიული განვითარების, ევროატლანტიკური კურსის გატარების და მეთვალყურის (ვოჩდოგი) ფუნქციის წარმატებით განხორციელების საქმეში.

მასალების გადაბეჭდვის წესი