„ქართული ოცნების“ ძირითადი მიღწევები:

დემოკრატიული განვითარება

1. 2012 წლიდან საქართველოში დემოკრატიის ხარისხი და ადამიანის უფლებების დაცვის მდგომარეობა თვისებრივად გაუმჯობესდა: 2012 წელს საქართველო 24 000 პატიმრით ევროპაში პირველ ადგილზე იყო. დღეისათვის ეს მაჩვენებელი ორნახევარჯერ, ანუ 9 700 პატიმრამდე შემცირდა. 12-ჯერ შემცირდა პატიმრების სიკვდილიანობა და წელიწადში 140- ის ნაცვლად 12-ი შეადგინა. აღიკვეთა პატიმრების წამებისა და არაადამიანური მოპყრობის პრაქტიკა: 2012 წლიდან დღემდე ციხის ადმინისტრაციის მიერ პატიმრის წამების ან არაადამიანური მოპყრობის არცერთი პრეცედენტი არ ყოფილა;

2. ციხეების გადავსების, „ნულოვანი ტოლერანტობის“ პოლიტიკის, ქუჩაში ადამიანების დახვრეტისა და ხელისუფლების ტოტალური თვითნებობის პრაქტიკის აღკვეთის ფონზე, ქვეყანაში კრიმინოგენური ვითარება სტაბილურია. ამის დასტურია ის, რომ 2012 წლიდან დღემდე მკვლელობის, ქურდობის, ძარცვის, ყაჩაღობისა და სხვა დანაშაულთა სტატისტიკა არ გაზრდილა;

3. 2012 წელს აღიკვეთა ბიზნესის მასობრივი რეკეტის პრაქტიკა. დღეს ბიზნესი ხელისუფლების წნეხისგან სრულიად თავისუფალია. 4 წლის განმავლობაში ბიზნესმენზე ზეწოლის პრეცედენტი არ ყოფილა;

4. ქვეყანაში უზრუნველყოფილია მედიის თავისუფლება. თუ 2012 წლამდე სამივე ნაციონალური ტელეარხი ხელისუფლების სრული გავლენის ქვეშ ფუნქციონირებდა, დღეს მედიასივრცე ხელისუფლების კონტროლისგან სრულიად თავისუფალია;

5. სასამართლოების პერსონალური შემადგენლობის არსებითად შენარჩუნების მიუხედავად, სასამართლო გათავისუფლდა პოლიტიკური წნეხისგან;

6. აღიკვეთა ტოტალური თვალთვალის, მოსმენისა და შანტაჟის მახინჯი პრაქტიკა, რომელიც „ნაციონალური მოძრაობის“ რეჟიმის მთავარ იარაღად იყო ქცეული. დღეს ადამიანებს ხელისუფლებისგან უსამართლო მოპყრობის შიში აღარ აქვთ – სახელმწიფო სიტყვისა და შეკრების თავისუფლებას არალეგიტიმურ ძალადობასა და სისასტიკეს აღარ უპირისპირებს;

7. აღიკვეთა არჩევნების გაყალბების პრაქტიკა. საყოველთაო აღიარებით, 2013 და 2014 წლების არჩევნები დემოკრატიული პრინციპების სრული დაცვით ჩატარდა. სოციოლოგიური კვლევები ადასტურებს, რომ მოსახლეობის უდიდესი ნაწილი საარჩევნო ადმინისტრაციას ენდობა.

სოციალური განვითარება

2013-2016 წლებში ხელისუფლება ჯანდაცვის, სოციალური უზრუნველყოფის, განათლებისა და კულტურის სფეროებში ქმედით პოლიტიკას ახორციელებდა:

1. ამოქმედდა საყოველთაო ჯანდაცვის პროგრამა, რომლის ფარგლებშიც 2 200 000-ზე მეტი შემთხვევა დაფინანსდა. გადარჩა ათი ათასობით ადამიანის სოცოცხლე, შემცირდა ბავშვთა სიკვდილიანობა;

2. 2016 წლიდან ჯანდაცვის სამინისტრომ დაიწყო ძუძუს ადრეული კიბოს აგრესიული HER-2 რეცეპტორდადებითი დიაგნოზის მქონე პირების ძვირადღირებული მედიკამენტით უზრუნველყოფა. ძუძუს კიბოს მქონე საქართველოს მოქალაქე ქალბატონებისთვის (გარდა ქ. თბილისში რეგისტრირებული მოსახლეობისა), ჯანდაცვის სამინისტრო მედიკამენტის ღირებულების 80 %-ს აფინანსებს.

3. ამოქმედდა C-ჰეპატიტის პროგრამა, რომლის ფარგლებშიც პაციენტები მკურნალობის ძვირადღირებულ კურსს სრულიად უფასოდ გადიან. პროგრამით უკვე 8 000-მა პაციენტმა ისარგებლა. აქედან, 90%-მა ვირუსი დაამარცხა;

4. შეიქმნა „სოლიდარობის ფონდი“, რომელმაც სიმსივნით დაავადებული 275 ბავშვისა და ახალგაზრდის მკურნალობა დააფინანსა. ფონდის ამოქმედების შემდეგ, უსახსრობის გამო საქართველოში სიმსივნით არცერთი ბავშვი არ გარდაცვლილა. ასეთი პროექტი მანამდე ჩვენ ქვეყანაში არ განხორციელებულა.

5. ხელისუფლების ქმედითი ნარკოპოლიტიკის შედეგად, 99%-ით შემცირდა ე.წ. „კრაკადილის“, „ვინტისა“ და „ჯეფის“, ხოლო 90%-ით – ე.წ. ბიონარკოტიკის მოხმარება;

6. 2013 წლიდან სოციალური დაცვის პროგრამების ბიუჯეტი 62%-ით გაიზარდა;

7. 2012 წელთან შედარებით 65%-ით გაიზარდა ასაკობრივი პენსია, 80% -ით კი – მკვეთრად გამოხატული შშმ პირების პენსია. მთაში პენსია გაიზარდა დამატებით 20%-ით;

8. მნიშვნელოვნად გაიზარდა, ზოგიერთ შემთხვევაში კი გაორმაგდა უმწეოთა დახმარება;

9. დევნილების პრობლემების მოგვარებისთვის განკუთვნილი დაფინანსება გასამმაგდა. 2013-2016 წლებში საცხოვრებელი ბინა 6 000-ზე მეტმა დევნილმა ოჯახმა მიიღო. უკვე დაწყებულია პროექტები, რომლებიც ახალი საცხოვრებლით დამატებით 5 000-ზე მეტ დევნილ ოჯახს უზრუნველყოფს;

10. 2012 წელთან შედარებით, განათლების სფეროს ბიუჯეტი 56%-ით გაიზარდა;

11. მასწავლებლის საბაზისო ხელფასი 65%-ით, საშუალო ხელფასი კი 70%-ით გაიზარდა;

12. ამოქმედდა „უფასო სახელმძღვანელოების პროგრამა“, რომლითაც 500 ათასი მოსწავლე სარგებლობს;

13. ახალი პროგრამის ფარგლებში, 1 200-მდე სკოლას უფასო ტრანსპორტი ემსახურება;

14. 2013-2016 წლებში 1 500-მდე საჯარო სკოლის რეაბილიტაცია განხორციელდა, 1 700-მდე სკოლაში კი ინვენტარი განახლდა; დასრულდა 10, მიმდინარეობს 10 და იწყება 7 ახალი სკოლის მშენებლობა;

15. 41%-ით გაიზარდა უმაღლესი განათლების, ხოლო 83%-ით – პროფესიული განათლების დაფინანსება;

16. უნივერსიტეტებში დაიწყო პრიორიტეტული მიმართულებების დაფინანსება. მთელი რიგი ფაკულტეტებისა სრულიად უფასო გახდა, რითაც უკვე ისარგებლა 10 000-მდე სტუდენტმა. საერთო ჯამში, სახელმწიფოს მიერ ფინანსდება სტუდენტთა საერთო რაოდენობის ნახევარზე მეტი;

17. 2012 წლის შემდეგ მეცნიერების დაფინანსება 82%-ით გაიზარდა;

18. საზღვარგარეთ სწავლის გაგრძელების მსურველი მოქალაქეებისთვის 270- მდე სახელმწიფო სტიპენდია გაიცა;

19. საბავშვო ბაღები სრულიად უფასო გახდა. შედეგად, სკოლამდელ დაწესებულებებში ბავშვების რაოდენობა რამდენჯერმე გაიზარდა.

საგარეო პოლიტიკა და უსაფრთხოება

„ქართული ოცნების“ წარმატებული საგარეო პოლიტიკის შედეგად, მნიშვნელოვნად გაიზარდა ევროპულ და ევროატლანტიკურ სტრუქტურებში ქვეყნის ინტეგრაციის ტემპები და მნიშვნელოვნად შემცირდა ქვეყნის საგარეო-პოლიტიკური რისკები:

1. წარმატებით დასრულდა ევროკავშირთან მოლაპარაკებები და ხელი მოეწერა ასოცირების შეთანხმებას;
2. ამოქმედდა ევროკავშირთან ღრმა და ყოვლისმომცველი თავისუფალი ვაჭრობის შესახებ შეთანხმება;
3. წელს ამოქმედდება ევროკავშირის ქვეყნებთან უვიზო მიმოსვლის რეჟიმი, რითაც საქართველოს ყველა მოქალაქე ისარგებლებს;
4. ხელი მოეწერა ევროკავშირთან თავისუფალი ვაჭრობის ხელშეკრულებას, რითაც საქართველოსთვის ახალი ბაზარი გაიხსნა – 28 ქვეყნითა და 500 მილიონი მომხმარებლით;
5. ღრმავდება თანამშრომლობა საქართველოს სტრატეგიულ პარტნიორთან – ამერიკის შეერთებულ შტატებთან;
6. საქართველო განაგრძობს თანმიმდევრულ სვლას ნატო-ს წევრობისკენ;
7. წინა ხელისუფლების ავანტიურისტული პოლიტიკისგან განსხვავებით, რამაც ქვეყანას უმძიმესი შედეგები მოუტანა, ჩვენი ხელისუფლება პრაგმატულ საგარეო პოლიტიკას ახორციელებს. ამასთან, საქართველო წარმატებით უზრუნველყოფს ოკუპირებული ტერიტორიების არაღიარების პოლიტიკის გატარებას;
8. ღრმავდება პოლიტიკური და ეკონომიკური ურთიერთობები რეგიონის ყველა ქვეყანასთან;
9. ღრმავდება ეკონომიკური ურთიერთობები ჩინეთთან. გადაიდგა უმნიშვნელოვანესი ნაბიჯები „აბრეშუმის გზის“ პროექტის განხორციელების მიმართულებით, რაც საქართველოს უმნიშვნელოვანეს გეოპოლიტიკურ ფუნქციას შესძენს.

ეკონომიკური განვითარება

ეკონომიკური განვითარების თავალსაზრისით „ქართულ ოცნებას“ ძალზე მძიმე მემკვიდრეობა დახვდა. თუმცა, ამ გარემოებისა და რეგიონში არსებული ეკონომიკური პრობლემების მიუხედავად, ხელისუფლებამ ქვეყნის ეკონომიკური წინსვლა უზრუნველყო. ხელისუფლებაში „ქართული ოცნების“ მოსვლის შემდეგ, საქართველო, ეკონომიკური ზრდის თვალსაზრისით, რეგიონის ერთ-ერთი ლიდერი გახდა. 2014 წელს საქართველოში, ევროპის მასშტაბით, ეკონომიკური ზრდის ყველაზე მაღალი მაჩვენებელი დაფიქსირდა. ხელისუფლების ქმედითი ეკონომიკური პოლიტიკის შედეგად, „მსოფლიო ბანკის“ პროგნოზის შესაბამისად, 2017-2018 წლებში, ევროპასა და ცენტრალურ აზიაში საქართველოს ყველაზე მაღალი ეკონომიკური ზრდა ექნება (უზბეკეთის, თურქმენეთის და ტაჯიკეთის გარდა). ქვეყანამ წინსვლა განიცადა ეკონომიკური განვითარების სხვადასხვა მიმართულებით:

1. დამოუკიდებელი საქართველოს ისტორიაში პირველად, „ქართული ოცნების“ ხელისუფლების პირობებში, საქართველო „საშუალო და მაღალი შემოსავლის მქონე ქვეყნების“ რიგს შეუერთდა;
2. 2013-2015 წლებში, 2008-2012 წლებთან შედარებით, საქართველოში წელიწადში საშუალოდ 33%-ით მეტი პირდაპირი უცხოური ინვესტიცია შემოვიდა;
3. 2004 წელს საქართველოს მთლიანი საგარეო ვალი 1,9 მილიარდ დოლარს შეადგენდა, 2012 წელს კი ეს მაჩვენებელი 4,8 მილიარდ დოლარამდე გაიზარდა. 2015 წლის მდგომარეობით, მთლიანი საგარეო ვალი 200 მილიონი დოლარით არის შემცირებული;
4. საშემოსავლო გადასახადის გადახდის მაჩვენებლების მიხედვით, 2012-2016 წლებში, ადამიანების შემოსავლები 29%-ით გაიზარდა და ეს იმ პირობებში, როდესაც ინფლაცია 10%-ს არ აღემატებოდა;
5. „ქართული ოცნება“ მოსახლეობის დასაქმებაზე ორიენტირებულ ეკონომიკურ პოლიტიკას ახორციელებდა. შედეგად, 2013 წლიდან, დასაქმებულთა რაოდენობა საქართველოში 56 ათასით გაიზარდა. 2012 წლის შემდეგ, უმუშევრობის დონე 12%-მდე შემცირდა, მაშინ როცა, წინა ხელისუფლების პირობებში, უმუშევრობა გაიზარდა;
6. „ქართულმა ოცნებამ“ აქცენტი წარმოების განვითარებაზე გააკეთა. მცირე და საშუალო ბიზნესის განსავითარებლად მიზნობრივი პროგრამები განხორციელდა. პროგრამის – „აწარმოე საქართველოში“ ფარგლებში 400 მილიონ ლარზე მეტის ინვესტიცია გაიცა და მხარი დაეჭირა 187 საწარმოს;
7. 2013-2015 წლებში ქვეყანაში შემოსული ტურისტების რაოდენობამ 16,8 მილიონი შეადგინა, რაც 2005-2012 წლების რვაწლიან მაჩვენებელს (14,4 მილიონი) აღემატება;
8. 2013-2016 წლებში ქვეყნის ენერგეტიკულ სისტემას ჯამში დაემატა 415 მეგავატი დადგმული სიმძლავრის ელექტროსადგურები, მაშინ როცა, 2007-2012 წლებში, განხორციელებული პროექტების ჯამური დადგმული სიმძლავრე მხოლოდ 8 მეგავატი იყო. 2016 წლის ბოლომდე დამატებით 423 მეგავატი ჯამური დადგმული სიმძლავრის ელექტროსადგურების მშენებლობა დასრულდება.

 პრი­ო­რი­ტე­ტად იქ­ცა სოფ­ლის მე­ურ­ნე­ო­ბის გან­ვი­თა­რე­ბა:

1. სოფლის მეურნეობის საბიუჯეტო დაფინანსება საგრძნობლად გაიზარდა;
2. შეღავათიანი აგროკრედიტით ისარგებლა 26 474-მა ბენეფიციარმა, გაიცა 700 მილიონი ლარის და 208 მილიონი დოლარის სესხები;
3. ამოქმედდა მცირემიწიან ფერმერთა ხელშეწყობის პროექტი, რომლის ფარგლებშიც 700 ათასზე მეტმა მცირემიწიანმა ფრმერმა 351 მილიონი ლარის დახმარება მიიღო. შედეგად, ყოველწლიურად 200 ათას ჰექტარზე მეტი მიწა მუშავდება;
4. ფერმერებს 280 მილიონ ლარამდე ღირებულების სასოფლო-სამეურნეო ინვენტარი და მცენარეთა მოვლის საშუალებები უსასყიდლოდ გადაეცათ;
5. 2013-2016 წლებში 150 ახალი აგრარული საწარმოს შექმნა 115 მილიონი დოლარით დაფინანსდა, 700 საწარმო კი გაფართოვდა და გადაიარაღდა;
6. ამოქმედდა აგროდაზღვევის პროგრამა: 2016 წლის მაისის მდგომარეობით, აგროდაზღვევის პროექტის ფარგლებში, გაცემულია 11 986 პოლისი, დაიზღვა 77 მილიონი ლარის ღირებულების მოსავალი და 13 181 ჰა მიწის ფართობი. დამონტაჟდა სეტყვის საწინააღმდეგო დანადგარები, რის შედეგადაც კახეთში მოსავალი 30%-ით გაიზარდა;
7. წყალუზრუნველყოფილი სასოფლო-სამეურნეო მიწის ფართობი 45 000 ჰექტრიდან 106 000 ჰექტრამდე, ხოლო დაშრობილისა – 14 000 ჰექტრიდან 31 575 ჰექტრამდე გაიზარდა;
8. პროგრამის – „დანერგე მომავალი“ ფარგლებში 1 400 ჰექტარი ინტენსიური ტიპის მრავალწლიანი ხეხილის ბაღები გაშენდა; სახელმწიფოს დახმარებითა და შეღავათების დაწესებით 1 500-ზე მეტი სასოფლო-სამეურნეო კოოპერატივი შეიქმნა;
9. გაიზარდა სოფლის მეურნეობის პროდუქციის ექსპორტი ევროკავშირში.

მნიშ­ვნე­ლოვ­ნად გა­ი­ზარ­და ინ­ფრას­ტრუქ­ტუ­რის გან­ვი­თა­რე­ბის ტემ­პე­ბი

1. 2013-2016 წლებში, 2007-2012 წლებთან შედარებით, წელიწადში საშუალოდ ორჯერ მეტი გზა იგებოდა; 2006-2012 წლებში ავტობანზე წელიწადში საშუალოდ 10,1 კმ, 2013-2015 წლებში კი – 28,4 კმ გზა დაიგო;
2. 2013 წლიდან მოსახლეობისთვის წყალმომარაგების პრობლემის გადასაჭრელად ნახევარ მილიარდ ლარზე მეტი დაიხარჯა. უკვე დაწყებულია დაახლოებით 1,5 მილიარდი ლარის ღირებულების პროექტები, რომელთა დასრულების შემდეგაც, 2020 წლისთვის, 24-საათიანი ხარისხიანი წყალმომარაგებით დამატებით 500 ათასამდე ადამიანი იქნება უზრუნველყოფილი;
3. საგრძნობად გაიზარდა გაზიფიცირების სამუშაოების მოცულობა: 2013-2016 წლებში, საქართველოს მაშტაბით, გაზმომარაგების ქსელში დამატებით 138 ათასამდე პოტენციური აბონენტი ჩაერთო;
4. 2012-2015 წლებში ელექტროენერგიის მიწოდების ქსელში 29 სოფელი ჩაერთო, რომელთაც ელექტროენერგია მანამდე არასოდეს მიეწოდებოდათ. უშუქო სოფლების ქსელში ჩართვის პროცესი გრძელდება;
5. დაიწყო ქვეყნის ინტერნეტიზაციის პროექტი, რომელიც რეგიონებში მაღალსიჩქარიან ინტერნეტკავშირს უზრუნველყოფს.