რეკლამა

„ჰილტონ ბათუმი“ – შეუზღუდავი სივრცე შშმ პირების დასაქმებისთვის

26 ივნისი, 2017 • 5197
„ჰილტონ ბათუმი“ – შეუზღუდავი სივრცე შშმ პირების დასაქმებისთვის

39 წლის მალხაზ წითელაძეს არასდროს უმუშავია. მალხაზის სტატუსი განსაზღვრულია, როგორც შეზღუდული შესაძლებლობის მქონე. პირველად სამსახურში ორი თვის წინ წავიდა. მალხაზი სასტუმრო „ჰილტონ ბათუმის“ სამრეცხაოში მუშაობს.

„შემთხვევით გავიგე, რომ მიუხედავად ჩემი სტატუსისა, „ჰილტონში“ შეიძლებოდა მუშაობა დამეწყო. სამუშაო რთული არაა – თეთრეულს ვარჩევ, ვრეცხავ, ვაშრობ, მთავარი რაც არის – დასაქმებული ვარ და ხელფასი მაქვს. ჩემი ფიზიკური მდგომარეობის გამო ვერ ვსაქმდებოდი. სულ იყო დაპირებები, მაგრამ არასდროს მქონია სამსახური. მუშაობა რომ დავიწყე ყველამ გაიგო და გაიკვირვა, სასტუმროში როგორ გამუშავებენო. ორი თვეა, რაც „ჰილტონ ბათუმის“ თანამშრომელი ვარ.  არაჩვეულებრივი გუნდი დამხვდა,“ – ამბობს მალხაზ წითელაძე.

მალხაზ წითელაძე.

მალხაზ წითელაძე.

სამრეცხაოში მუშაობს ედნარ მიქელაძეც. ედნარი სმენადაქვეითებულია. სასტუმროში პროფესიულ კოლეჯ „ბლექსიდან“ მოხვდა. თავიდან პრაქტიკებზე მივიდა, ახლა კი ოფიციალურად დასაქმდა.

„ძალიან მომწონს „ჰილტონში“ მუშაობა. კმაყოფილი ვარ იმ გარემოთი, რაც აქ არის.  სასტუმროს პერსონალი ძალიან მეხმარება. ცდილობენ ჩემთან კომუნიკაცია დაამყარონ და მუშაობაშიც დამეხმარონ. ურთიერთპატივისცემა გვაქვს. მომწონს აქაური გარემო და ვამაყობ, რომ „ჰილტონის“ თანამშრომელი ვარ,“ – ამბობს ედნარი.

ედნარ მიქელაძე

ედნარ მიქელაძე

შეზღუდული შესაძლებლობის მქონეა პალინა ჯაღათაშვილიც. პალინა ერთი წელია, რაც „ჰილტონის“ თანამშრომელია.

„ერთი წლის წინ მოვედი პრაქტიკაზე „ჰილტონ ბათუმში“, პრაქტიკა როცა დავასრულე თანამშრომლად ამიყვანეს – მზარეული ვარ. მიწევს სხვადასხვა პროდუქტის დაჭრა, დალაგება. პროდუქტზე რიცხვების დატანა, ვადების შემოწმება, გაფუჭებული და საღი პროდუქტის გადარჩევა, დალაგება, მაცივარში შენახვა. როდესაც ძალიან ბევრი სტუმარი გვყავს, კლიენტებთანაც მიწევს ურთიერთობა საუზმეზე. ქართველებთან ურთიერთობა არ მიჭირს, ტუჩების მოძრაობით ვხვდები რას მეუბნებიან, უცხოელებთან ცოტა რთულია.  სტუმრების მხრიდან ყოველთვის პოზიტიური განწყობა მოდის – როდესაც ხვდებიან, რომ საუბარი არ შემიძლია, მერე თვითონაც ჟესტების ენაზე გადადიან და ცდილობენ ამ გზით  მიმახვედრონ რა სჭირდებათ“, – ამბობს პალინა.

სამსახურის გარდა პალინა აქტიურადაა ჩართული საზოგადოებრივ საქმიანობაში. მეგობრებთან ერთად „სმენის არმქონე და პრობლემების მქონე ბავშვთა და მშობელთა უფლებების დაცვის ორგანიზაცია“ დაარსა. თავისუფალ დროს კი ჟესტურ ენას ასწავლის ბავშვებს.

პალინა ჯაღათაშვილი

პალინა ჯაღათაშვილი

კიდევ ერთი შშმ პირი, გოგიტა მალაყმაძე სასტუმრო „ჰილტონ ბათუმს“ აიტი დეპარტამენტში ჰყავს დასაქმებული.

„სტაჟირებაზე ვარ სამი თვით. ძირითადად, სწავლა მევალება, კომპიუტერზე პროგრამის ჩაწერა, ტექნიკურად გამართვა. აიტი მენეჯერს ვეხმარები. კომპიუტერული ტექნოლოგიებით 13-14 წლის ასაკში დავინტერესდი. თავიდან მასწავლებელი დავიქირავე, შემდეგ ინტერნეტის და გუგლის დახმარებით ვისწავლე ყველაფერი. სასტუმროში სამუშაო გარემო ძალიან მომწონს, კარგი ადამიანები მუშაობენ, ადვილად შევდივარ კონტაქტში და, რაც მთავარია, არ ვგრძნობ თავს განსხვავებულად“, – ამბობს გოგიტა.

გოგიტა მალაყმაძე

გოგიტა მალაყმაძე

„ჰილტონ ბათუმში“ ამ დროისათვის სულ ხუთი შშმ პირია დასაქმებული. იმ ფონზე, როცა დიდი კომპანიები თავს არიდებენ თანამშრომლად შშმ პირების აყვანას, რატომ გადაწყვიტა „ჰილტონ ბათუმმა“ ამ ადამიანებისთვის სრულყოფილი სამუშაო გარემო შეექმნა? ამ კითხვაზე ზუსტი პასუხი აქვს „ჰილტონ ბათუმის“ ადამიანური რესურსების მართვის ხელმძღვანელს, ნინო მესაბლიშვილი – ამ სასტუმროს მენეჯმენტისთვის არ არსებობს განსხვავებული რასა, სქესი, ასაკი, შეზღუდული შესაძლებლობები:

„ამას ვამბობ ყველგან. ჩვენ არასოდეს, არც ერთ პოზიციაზე არ ვზღუდავთ ადამიანებს. დაცვის თანამშრომლებადაც კი ორი-სამი გვყავს გოგო. გვყავდა გოგო აიტი მენეჯერი, უცხოელი, რომელმაც გახსნა ეს სასტუმრო. ჩვენ ვანგრევთ სტერეოტიპებს, ჩვენ ვამბობთ – მთავარია, სურვილი და უნარები, რომ საქმე აკეთო. დანარჩენი ადამიანზეა დამოკიდებული.

ჩვენ გვყავდა ფერადკანიანი თანამშრომელი, სხვადასხვა ქვეყნის, სხვადასხვა რელიგიის ადამიანები იყვნენ ჩვენს გუნდში. ახლაც გერმანელი დირექტორი გვყავს,  საოპერაციოს თურქი მენეჯერი გვყავს, ანუ ინტერნაციონალური კომპანია ვართ.

ჰილტონი

სასტუმრო „ჰილტონ ბათუმი“

რაც შეეხება შეზღუდული შესაძლებლობის მქონე პირებს, სოციალურმა სააგენტომ გვთხოვა, რომ მათთვის მიგვეცა პრაქტიკის გავლის შანს „ჰილტონ ბათუმში“. პირველად პალინა გამოგვიგზავნეს – სამზარეულოში. იმდენად კარგად გაართვა თავი, რომ პალინა შტატში ავიყვანეთ. ამის მერე ჩვენ ვთქვით: – მოდი, რატომაც არა, ავიყვანოთ სხვა კანდიდატები. შშმ პირების ბაზა არსებობს, არის სააგენტოები, სხვადასხა კომპანია, ფონდები, რომლებიც ამ ხალხის დასაქმებაზე ზრუნავენ. მოაქვთ კანდიდატების რეზიუმე, რა უნარები აქვთ, რა აინტერესებთ და ჩვენ თვითონ ვფიქრობთ რა შეიძლება ამ ადამიანებს მოვუძებნოთ, სად დავასაქმოთ. ყველა ადამიანს შეიძლება მოუძებნო ისეთი რამ, რის გაკეთებასაც შეძლებს. ასე დაიწყო ეს პროექტი“.

„ჰილტონ ბათუმის“ ადამიანური რესურსების მართვის ხელმძღვანელი ნინო  მესაბლიშვილი ამბობს, რომ ეს არ არის ერთჯერადი აქცია – „ჰილტონ ბათუმი“ ამ პრაქტიკის გაგრძელებას აპირებს: „სამომავლოდაც გვაქვს პროექტი – პარკინგზე გვინდა ავიყვანოთ თანამშრომლები – პარკინგის ბარიერს გააკონტროლებენ ზაფხულში. აქ  მხოლოდ  შშმ პირების დასაქმებას ვფიქრობთ – ხუთ-ექვს ადამიანზეა ლაპარაკი. უკვე მივიღე ექვსი კანდიდატი, სხვადასხვა სააგენტოდან და ფონდიდან, გასაუბრებაც ჩავატარეთ. ეს სეზონური ხასიათის პროექტია, მაგრამ მსგავსი პრაქტიკის გაგრძელებას ვაპირებთ – სეზონურადაც ავიყვანთ, არასეზონურადაც, პრაქტიკას ყველას გავატარებთ“.

ნინო მესაბლიშვილი საკუთარ გამოცდილებაზე დაყრდნობით სხვა კომპანიებსაც მოუწოდებს ნუ დაიშურებენ ძალისხმევას შშმ პირების დასასაქმებლად: „თუ ინფრასტრუქტურა უწყობს ხელს კომპანიას, მოვუწოდებ აუცილებლად სცადონ თანამშრომლობა შშმ პირებთან. შშმ პირები ძალიან ბევრ კონტექსტში სჯობიან იმათ, ვისაც შეზღუდული შესაძლებლობები არ აქვთ. გარდა იმისა, რომ მათ ძალიან უხარიათ სამსახურში მოსვლა, ასევ ძალიან  მონდომებულები არიან.

აი, მალხაზს 39 წლამდე არასდროს უმუშავია და ახლა მიეცა ამის საშუალება. ისეთი მოტივირებული, მონდომებულია… სამრეცხაოს სხვა თანამშრომლებს უკვე აჯობა. პალინაც იმდენად ძლიერია… ბევრს აჯობა. მე მოვუწოდებ დამსაქმებლებს, რომ აუცილებლად მისცენ მათ შანსი, სცადონ მათთან თანამშრომლობა. შეუძლიათ პრაქტიკით დაიწყონ, ამ დროს გამოჩნდება ადამიანს რა შეუძლია…

ეს ის პერსონალია, ვინც დიდხანს დაგრჩება. მოსწონთ შენთან მუშაობა, ბედნიერები არიან, ესენი იმუშავებენ შენთან ერთად მანამ, სანამ სხვა უკეთესი ვარიანტი არ გამოუჩნდებათ“.

„ჰილტონ ბათუმში“ ზუსტად იციან, რომ მათთან დასაქმებულ შშმ პირებს აუცილებლად ექნებათ კარიერულ ზრდა: „პალინა რომ მოვიდა, ერთი საფეხურით დაბლა იყო, უკვე დაწინაურდა. პალინას  აქვს დიდი შანსი, რომ სამზარეულოში ყველა ეტაპი გაიაროს. სამრეცხაოშიც იგივეა, ჩვენ გვაქვს დონეები და დონეების მიხედვით შეუძლიათ წინსვლა. ადამიანი რა პოზიციაზეც იწყებს მუშაობას, სამუდამოდ იქ არ დარჩება. მათაც იგივე მოთხოვნებს ვუყენებ, რასაც სხვებს – ინგლისური უნდა იცოდნენ. კვირაში ორი დღე ინგლისურის მასწავლებელი მყავს დაქირავებული – თანამშრომლებს უფასოდ ვასწავლით“.

ნინო მესაბლიშვილი ამბობს, რომ „ჰილტონ ბათუმი“ განსაკუთრებულ მადლობას უხდის სააგენტოებს, რომელთა დახმარებითაც მოიძიეს ეს თანამშრომლები. სხვა კომპანიებს კი დაბეჯითებით ურჩევს, რომ ერთი შშმ პირს მაინც თუ აიყვანენ სამსახურში, „დარწმუნდებიან, რომ ნამდვილად სწორი გადაწყვეტილება მიიღეს“.

მასალების გადაბეჭდვის წესი